Reykingar bannaðar!!

Áratugum saman hafa reykingar fólks verið ríkissjóði drjúg tekjulind; svo drjúg að allir með tölu, sem hafa þurft að leita sér lækninga vegna óhollustu þeirra, hafa verið búnir að borga fyrir læknishjálpina með tóbakssköttunum, þá, þegar og ef þeir hafa þurft á henni að halda. Langflestir reykingamenn deyja þó á endanum, í ágætri elli, án þess að hafa nokkkurn tíman þurft að leita læknis vegna nautnarinnar, kannski fimm árum yngri en ella. En hvað með það? Fyrir því má færa rök að tóbaksnautnin, sé um margt óheppileg. Hún er að sönnu dýr, vegna ofurskattheimtu, og vegna óhollustu fyrir suma (ekki alla) og svo er hún svolítið sóðaleg, sé hreinlætis ekki gætt. En þessa ágalla er að mestu hægt að laga. Að erlendri fyrirmynd, fann Siv Friðleifsdóttir það út fyrir Íslendinga, að áfengi og tóbak ættu ekki samleið. Því var brugðið á það ráð að banna viðskiptamönnum veitingahúsa að reykja í því skyni að vernda starfsfólk veitingamannsins fyrir óhollustu reykinganna, jafnvel þótt þetta sama starfsfólk reykti sjálft. Þetta var mikið snilldarráð. Ég bíð eftir því að starfsfólki veitingahúsa verði bannað að afgreiða feitt fólk um mat, vegna þess að rök hníga að því að það hafi ekki gott af greiðanum. Þeim, sem þessar línur skrifar er það óskiljanlegt hvers vegna löggjafinn gat ekki fetað reglur meðalhófs og jafnræðis í þessu bannmáli og haft undanþáguheimild í lögunum, þannig að veitingamenn gætu sótt um undanþágu frá banninu. Með slíkri heimild hefði það unnist að veitingamenn hefðu sjálfir haft það í hendi sér, hvort þeir heimiluðu reykingar eður ei, og kúnninn haft val. Þannig yrði engum úthýst í krafti laganna. En það, sem “velferðar- og kærleiksfasistunum” hefur rækilega yfirsést, er sú nöturlega staðreynd að áfengi og tóbak eiga ágæta samleið. Af þessu leiðir að lögin, sem nú gilda, skekkja samkeppnisstöðu veitingamanna herfilega. Allir þeir veitingamenn sem með góðu móti geta komið sér upp útiaðstöðu til reykinga fyrri kúnna sína munu verða ofaná í samkeppni við þá sem ekki geta komið slíku við. Eigum við að kalla þetta “jákvæða mismunum”?

Athugasemdir

[Linda, 11.6.2007 kl. 00:21]

  þú ert snilli, ekki spurning. Ég hef verið reyklaus í ár og er rosalega glöð með það, er ein af þeim óþolandi x-smokers sem þolir ekki reykingar veit algjör hræsni viðurkenni það Sér lokuð herb með sófum og kózy stemmingu fyrir smókers og lofræstingu dauðans hefði verið góð málamiðlum fyrir veitingamenn að mínu mati.  Enn hvað veit ég er x-smóker með gíkantískit fasisma tude vegna lyktarinnar. 

[Gústaf Níelsson, 11.6.2007 kl. 01:13]

Ágæta Linda. Margt mislíkar okkur um lesti og háttsemi samferðarmanna okkar í lífinu. En hið umburðarlynda lýðræðissamfélags, sem við trúlega viljum öll eiga, má ekki yfirgefa grundvallargildi sín. Þá breytist það í óskapnað. Ég er ekki viss um að þú hafir lesið af athygli það sem ég var að segja, því það sem þér kann að þykja óþefur, kann öðrum að þykja ilmur.  

[Jón Ellert Tryggvason (IP-tala skráð) 11.6.2007 kl. 15:00]

Sæll Félagi, það var mikið að þú náðir að skrifa um þetta bann sem fer svo illa í marga. Ég var á ferð um Heathrow flugvöll um daginn og sá svona herbergi, varð að kíkja inn og ath hvort fýla væri þarna inni en viti menn það var svo rosaleg loftræsting þarna að menn með hárkollur væri ekki óhætt þarna inni og ekki vottur af sigarettureyk. Bara svona þér til upplýsinga.

[Gústaf Níelsson, 11.6.2007 kl. 17:05]

Það hefur verið lengi vitað Jón Ellert að góð loftræstikerfi geta léttilega eytt áhrifum tóbaksreyks, sem mörgum þykir hvimleiður. Fyrir ekki margt löngu var ég á hóteli í S-Evrópu, þar sem eitt slíkt kerfi var í veitingasal hótelsins, en hann var tvískiptur fyrir reyk og reyklausa. Fyrir hina reyklausu var þetta fyrirkomulag án ama.

[Guðsteinn Haukur Barkarson, 20.6.2007 kl. 06:27]

Amen Gústaf, þú tekur vel á viðkæmu málefni, það er farið með okkur reykingamennina eins og hinar verstu skepnur, þú minnir okkur réttilega á að við sem reykjum eigum okkar rétt líka. Við erum ekki annars flokks þegnar vegna fíknar okkar og vil ég þakka þér fyrir góðan pistil ! Guð blessi þig bróðir.