Ætlar Jóhanna þverhaus að gefa sig?

Þegar þetta er ritað hefur ekki birst nein opinber yfirlýsing frá Jóhönnu forsætis um það að hún hafi látið undan þrýstingi samflokksmanna sinna. Hún var að vísu búin að segja að hún ætlaði ekki að taka að sér formennsku í Samfylkingunni, en enginn vill hlusta á það. Nú dugar auðvitað ekkert annað en blysför að heimili hennar eða vinnustað, eftir því á hvorum staðnum hún ver kvöldunum. Nú skal þverhausinn fá að finna fyrir raunverulegum vilja almennings í landinu, að sögn skipuleggjenda göngunnar. Mér er að vísu nokk sama hvort Jóhanna lætur undan þrýstingi eða ekki, en vona samt að hún geri það á endanum, þótt ég sé nú enginn sérstakur almenningur í þessu landi, eiginlega frekar slakur almenningur, held ég. Von mín á eftirgjöf Jóhönnu byggist á því að hún er raunverulega versti forustukosturinn. Hún hefur aldrei verið til forustu fallin í stjórnmálum, þótt pólitískt langlífi hennar sé nokkurt. 

Ég segi því: Áfram Jóhanna - fram til sigurs - þinn tími er kominn!!

Blysför til Jóhönnu

Athugasemdir

[Ingólfur Þór Guðmundsson, 11.3.2009 kl. 23:36]

Maður sér á nýjustu fréttum að það hefur verið gríðarleg mæting í þessa blessuðu blysför hjá Samfó...  

http://www.visir.is/article/20090311/FRETTIR01/122609953

[Gústaf Níelsson, 11.3.2009 kl. 23:58]

Hinar gríðarlegu vinsældir Jóhönnu forsætis eru auðvitað ýktar og tilfallandi tilbúningur í skyndikönnunum. Enginn hugur fylgir máli eins og ráða má af þátttöku í blysförinni og ekki hamlaði óveður, og fyrir þessu hefur Jóhanna tilfinningu. Þess vegna hefur hún ekki treyst sér til að taka kostaboðinu. En fjölmiðlar láta auðvitað áfram blekkja sig.

[Ingólfur Þór Guðmundsson, 12.3.2009 kl. 07:24]

Við erum náttúrulega að sjá Samfylkinguna stunda það sem að hún er einna best í, það er að setja upp leikrit, og þá helst farsa.