Hvalrekinn Eva Joly

Það var nú aldeilis lán í óláni að hana Evu skylda hafa rekið á fjörur okkar Íslendinga. Hvílíkur hvalreki, Íslands óhamingju verður þá ekki allt að vopni. Það er engu líkara en að guð almáttugur hafi hafi snert íslenska jörð, slík er hrifningin og mikils er að vænta. Það er ekki ónýtt að fá að njóta alþjóðlegra sambanda rannsóknardómarans, enda vart að vænta að íslenskir saksóknarar, sem eru ekkert nema sveitakallar í samanburði við fransknorska djásnið, með ullarlagðana í rassgatinu, ráði við það að setja sig í samband við umheiminn.

Hún ætlar seint að yfirgefa okkur Íslendinga minnimáttarkenndin gagnvart útlendingum. Getur einhver í nafni upplýsingar og gagnsæis sagt okkur lúsugum almúgaskrílnum hvað erlendu samböndin hennar Evu munu kosta okkur í evrum talið?

Hægt að nýta sambönd Joly

Athugasemdir

[TARA, 11.3.2009 kl. 22:11]

Ég held að þetta hafi ekkert með minnimáttarkennd að gera...konan er einfaldlega mjög hæf og skynsöm og býr yfir mikilli reynslu og þekkingu, er yfirveguð og þekkt fyrir heiðarleika.

HvAð hún kostar, er kannski ekki aðalspurningin núna...heldur hvor hún getur leitt okkur í gegnum þetta og þá er það hverrar krónu virði.

[Ragnheiður , 11.3.2009 kl. 22:19]

haha já, ég las þetta hjá þér og mér datt óvart í hug þýska löggan sem kom hingað til að leysa Geirfinns og Guðmundarmál.

Ég veit annars ekkert um þessa konu en vona að málin verði grafin upp og skoðuð

[Árni Gunnarsson, 11.3.2009 kl. 22:23]

Þetta lagast Gústaf, þetta lagast. Hún er nú ekki farin að gera neinn óskunda ennþá. Kannski finnst ekkert. Vonum að allt blessist. Reynum að vera jákvæðir og hlakka til páskanna. Ekki leggjast í þunglyndi.

[Gústaf Níelsson, 11.3.2009 kl. 22:35]

Ágæta Tara. Það er til fjöldi Íslendinga sem eru hæfir, skynsamir, reynslumiklir og digrir af þekkingu, yfirvegum og heiðarleika. Vel kann það að vera að evrópskir pensjónistar virki vel (er hún kannski ekki komin á pensjón?) við rannsókn á örlögum Íslands. Þýski pensjónistinn Karl Schultz (hét hann það ekki Ragnheiður?) skoraði nú engin mörk í Guðmundar- og Geirfinnsmálum, en tók þó aukanúmer í morðmáli, sem kom upp meðan á dvöl hans stóð. Ekki misskilja mig dömur, ég vil rannsaka fall Ísland til enda og refsa sekum mönnum. En ég vil ekki búa til íslenskt "Banka-Guantanamo", þar sem reglum réttarríkisins er ýtt til hliðar, jafnvel þótt freistandi sé.

[Einar Áskelsson (IP-tala skráð) 11.3.2009 kl. 23:26]

Þú gætir kannski sagt okkur ágæti Gústaf hvað það myndi kosta okkur í evrum ef við nýttum okkur ekki aðstoð hennar? Þetta er alþjóðlegt mál, gríðarlega stórt að umfangi. Við höfum ekki reynslu hér til að takast á við málið. Því miður. Hún hefur það. Og á track record að baki sem er virðingarvert. Þess vegna er fólk að mæra hana. Ekki gamla góða minnimáttarkenndin. Sem er reyndar kapitúli út af fyrir sig.

[Gústaf Níelsson, 11.3.2009 kl. 23:51]

Ég veit ekki frekar en nokkur annar hver kostnaðurinn er af því að nota ekki Evu Einar sæll, en ég vil fá að vita hver kostnaðurinn er af því að nota hana. Ertu ósammála mér um það?